Рус
En
By

Адрас: 247710, г. Калінкавічы,
пл. Леніна, 1

Е-mail: mailrik@kalinkovichi.gov.by

Тэлефон: 8 (02345) 4 21 40;  факс : 8 (02345) 3-17-12

Плошча імя У.І.Леніна Чыгуначны вакзал Белаграпрамбанк Помнік 125-годдзю Палескай чыгункі Фонд сацыяльнай абароны насельніцтва Воінскае пахаванне вул. Куйбышава Гарадскі парк Калінкавіцкі раённы выканаўчы камітэт Храм іконы Свята-Казанскай Божай Маці
Плошча імя У.І.Леніна

Навіны раёна

7 кастрычніка 2020

Найяскравейшыя носьбіты этнакультурных традыцый

Березовка

“Бярозаўскія пералівы”

Фальклор – сапраўдная скарбніца духоўных каштоўнасцей, народны мастацкі летапіс. У ім знайшлі сваё адлюстраванне побыт народа, яго вераванні і памкненні, сацыяльныя і эстэтычныя ідэалы, погляды на сусвет.

Гэта культурнае багацце нашых продкаў, дзякуючы якому сёння захоўваецца пераемнасць традыцый і сувязь пакаленняў. Таму вывучэнне, захаванне і прапаганда народнай спадчыны — адзін з галоўных напрамкаў працы сучасных устаноў культуры.

Вялікая работа па адраджэнню народных святаў і абрадаў, збору і апрацоўцы фальклорнага матэрыялу, нацыянальных мясцовых традыцый праводзіцца ў Бярозаўскім і Вялікааўцюкоўскім сельскіх дамах культуры.

Гэтыя калектывы вядомы многім, бо бярозаўцы і аўцюкоўцы – найяскравейшыя носьбіты этнакультурных традыцый нашага раёна. Яны пастаянныя ўдзельнікі раённых і абласных культурных мерапрыемстваў, здымаліся для перадач на тэлебачанні; станавіліся пераможцамі і абласных, рэспубліканскіх і міжнародных фестываляў, аглядаў і конкурсаў.

У мінулым годзе іх нават запрасілі ў Мінск для ўдзелу ў Міжнародным фестывалі этнакультур, на якім нашы землякі яскрава і самабытна прадставілі гледачам народныя абрады Калінкавіцкага раёна.

І сёння, напярэдадні прафесійнага свята працаўнікоў культуры, давайце пазнаёмімся з гэтымі носьбітамі фальклору крышачку бліжэй.

Народны фальклорны ансамбль “Бярозаўскія пералівы” у адных толькі рэспубліканскіх ды абласных “Дажынках” прымаў удзел больш за пяць разоў. А што казаць пра знакаміты Усебеларускі фестываль народнага гумару? “Бярозаўскія пералівы” там даўно атрымалі пастаянную “прапіску”.

Калектыў гэты шматгранны, яму заўсёды ёсць, чым здзівіць гледачоў. Ён прымаў удзел у самых розных фальклорных святах і аглядах, а ўсіх яго дыпломаў-грамат ужо і не злічыць.

З самага заснавання ансамбля (1986 год) і па сённяшні час яго мастацкім кіраўніком з’яўляецца Паліна Лапацік.

У 1995 годзе за дасягнутыя поспехі “Бярозаўскім пералівам” было прысвоена ганаровае званне “Народны аматарскі калектыў”.

Удзельнікі ансамбля актыўна збіраюць мясцовы фальклор, адраджаюць і захоўваюць традыцыйныя святы і абрады. Напрыклад, штогод 7 красавіка на Благавешчанне яны запрашаюць аднавяскоўцаў разам з імі “пагукаць” вясну.

Сваю канцэртную дзейнасць “Бярозаўскія пералівы” нярэдка ажыццяўляюць сумесна з дзіцячым фальклорным ансамблем “Пацехі”, створаным у Бярозаўскім СДК. Галоўная ідэя калектыву – адраджэнне, захаванне і перадача ў спадчыну маладому пакаленню традыцыйных песень, танцаў і прыпевак гэтай мясцовасці.

— Фальклор цяжка ўтрымаць, — кажа Паліна Лапацік. – Асабліва сярод моладзі. Мы стараемся іх зацікавіць, і дзеці да нас ідуць.

Фальклорна-этнаграфічны калектыў Вялікааўцюкоўскага сельскага клуба-бібліятэкі

Фальклорна-этнаграфічны калектыў Вялікааўцюкоўскага сельскага клуба-бібліятэкі

Фальклорна-этнаграфічны калектыў Вялікааўцюкоўскага сельскага клуба-бібліятэкі быў створаны ў 1979 годзе. Сёння яго мастацкім кіраўніком з’яўляецца Ірына Марару.

У складзе калектыву налічваецца 12 чалавек ва ўзросце ад 36 да 82 гадоў. Усе яны вельмі любяць народныя песні, прыпеўкі, прыказкі. Словам, з задавальненнем захоўваюць мясцовыя абрады і традыцыі для нашчадкаў.

Удзельнікі вакальнага гурта з Вялікіх аўцюкоў — жаданыя госці на ўсіх раённых і абласных мерапрыемствах. Юр’я, Троіца, Купалле, Коляды, масленічныя і велікодныя мерапрыемствы – гэтыя абрады яны ведаюць дасканала. А вясельны абрад гэты калектыў праводзіць па сваёй уласнай, самабытнай аўцюкоўскай традыцыі.

Многія ўдзельніцы гэтага калектыву неаднаразова з’яўляліся ўдзельніцамі раённых і абласных выстаў дэкаратыўна-прыкладной творчасці. Сярод мясцовых народных умеліц ужо вядомыя нам Марыя Багдановіч (ткацтва і вышыўка), Валянціна Варабей, Вольга Лукашевіч, Любоў Зайцава (вышыўка, вышыўка крыжам). Канцэртныя касцюмы для выступленняў артысткі шыюць самі, аздабляюць іх вышыванкамі, а потым прыбіраюцца ў іх на абласныя і рэспубліканскія фэстывалі.

І ў завяршэнне хочацца сказаць некалькі слоў пра музеі, якім сёння адведзена кансалідуючая роля. Гэта адно з нямногіх месцаў, дзе можна па-сапраўднаму адчуць пераемнасць народных традыцый. У клубных установах раёна вядзецца мэтанакіраваная праца па стварэнню фальклорных куткоў, пакояў народнага побыту, міні-музеяў.

Як паведамілі ў Калінкавіцкім раённым цэнтры культуры і народнай творчасці, сёння ў многіх установах культуры аформлены такія куткі. У Бярозаўскім, Дудзіцкім, Юравіцкім, Крукавіцкім СДК, Хобненскім і Халодніцкім сельскіх клубах-бібліятэках, Даманавіцкім і Савіцкім СДК функцыянуюць музеі народнай творчасці, у якіх можна пазнаёміцца з гісторыяй населеных пунктаў і прадметамі побыту нашых продкаў.

У мінулым годзе адкрыўся яшчэ адзін міні-музей фальклорнага побыту ў Лясецкім сельскім клубе.

А маль ва ўсіх клубных установах раёна дзейнічаюць гурткі дэкаратыўна-прыкладной творчасці, дзе маладое пакаленне набывае навыкі па рукадзеллю, ткацтве, саломапляценню, лозапляценню, выпальванню, разьбе па дрэве і іншым народным промыслам.

Таццяна КАПІТАН.

Партал інфармацыйнай падтрымкі экспарту
Мэта99
Ганарымся, што навучылі
Беларуская натарыяльная палата
Дзяржаўны пагранічны камітэт
АДР
Землеўпарадкавальная служба
Памяць (спіс землякоў, загінулых у гады Вялікай Айчыннай вайны)
Гомельаблмаёмасць
Інтэрнэт-рэсурсы